जीवन
Parent Category: मराठी पुस्तके
Category: सय कवितासंग्रह
सखि, जीवन हा काचेचा जणू पेला
ठाऊक हे सकलजनाला - - -
किती सुंदरसा देवाने घडवीला
प्रत्येकासाठी निराळा - - -
सुखदुःखांच्या घटनांनी हा पेला
शिगोशीग की भरला - - -
अति नाजुक याची काच
नक्षी त्यावरती खास
सुमफलभारे लवती घोस - - -
परि सांभाळी जीवनरस तो भरला
निसटू नको दे त्याला - - - १
सखि, जीवन हा जणू बिलोरी आरसा
अजबसा जादुच्या सरसा - - -
गतकालाते उकलुनी दावी जैसा
आगामी पाही तैसा - - -
जशी नजर असे दिसे त्यास तो तैसा
सुंदरसा वा फुटका जरासा - - -
चैतन्ये रसरसलेला
उत्साहे सळसळलेला
कधि निरर्थ भासे सगळा - - -
परि सांभाळी निखळू नको दे सहसा
पुन्हा न मिळणे ऎसा - - - २
Hits: 310
