बाळराजाचे दोस्त
Parent Category: मराठी पुस्तके
Category: सय कवितासंग्रह
आली बघ चिऊताई । अंगणात दारापुढे ।
बाळराज खेळताना । मोतियांचा सडा पडे ॥१॥
आली बघ खारूताई । तुरूतुरू ती पळत ।
बाळराजाच्या गालात । गोड खळी ती पडत ॥२॥
आली बघ मनीमाऊ । सदा म्हणे म्याऊ म्याऊ ।
बाळराजाचा गे खाऊ । चला थोडा तिला देऊ ॥३॥
आला बघ पोपटभाऊ । विठूनामाचा गजर ।
बाळराजाची नजर । खिळलेली त्याचेवर ॥४॥
आले बघ कुत्रोपंत । शेपटी ती हालवीत ।
बाळराजासी पाहात । प्रेमे उभे ते दारात ॥५॥
बाळराजाचे हे दोस्त । येती दाराखिडकीत ।
पाहता त्या दिनरात । बाळ खूष हो मनात ॥६॥
Hits: 324
