कवितासखी
Parent Category: मराठी पुस्तके
Category: काव्यदीप पुस्तक - ६.काव्य
सोडुनी मजला जाऊ नको तू
बाई सखये कविते
ओळखीस नच झाले असती
दिवस चारही पुरते ---- १
संगतीत तव उडुनी जाती
क्षण किती मज ना कळते
साद घालता कैसी येशी
कोडे ना उलगडते ---- २
अवीट ऐशा तुझ्या सोबती
माझी मी नच उरते
समाधीत तव असता मीही
भान जगाचे नुरते ---- ३
भरजरी हा तव रेशिमशेला
पाहून मन हे खुलते
पेलवेल का परि हे मजला
ओझे असले भलते ---- ४
मातेपरि तू पाखर घाली
म्हणो काहीही जग ते
कसलीही मग भीती माझ्या
मनामधे ना उरते ---- ५
Hits: 429
