कांदा बटाटा
Parent Category: मराठी पुस्तके
Category: सय कवितासंग्रह
भाजीत भाजी पहिला मान
कांदाबटाट्याने सजले पान . . . १
जिवलग खरे पण स्वभाव वाकडा
जहाल नि मवाळ छत्तिसाचा आकडा . . . २
कांदा सारखा चिडायचा
रागराग फार करायचा . . . ३
रागाने लालबुंद व्हायचा
सा-यांच्या डोळा पाणी आणायचा . . . ४
बटाटा समजूत काढायचा
कध्धी नाही रागवायचा . . . ५
सा-यांना मदत करायचा
मिळून मिसळून वागायचा . . . ६
सारे कांद्याला हसू लागले
चिडका बिब्बा म्हणू लागले . . . ७
कांदा पटकन् रुसला
कोप-यात जाऊन बसला . . . ८
मुळूमुळू रडू लागला
पळत पळत बटाटा आला . . . ९
कांद्याला म्हणे हळू बटाटा
तू तर मोठा धीराचा बेटा . . . १०
सा-यांशी गोड गोड बोलावे
कुणा कधी ना रागवावे . . . ११
तेंव्हापासून कांदा गोड बोलू लागला
लाल रंग सोडून पांढरा झाला . . . १२
दोघांची छान गट्टी जमली
कांदा बटाट्याने रंगत आणली . . . १३
Hits: 335
