चाफेकर नि रानडे यांजवरील फटका -१
चाफेकर नि रानडे यांजवरील फटका -१
(जाति : स्वरगंगा)
महच्चरित सत्सुधांबुधीमधि करू सुमन हें पाणबुडें ।
अखंड-सद्गुणमंडित मौक्तिक निधान सद्यश मग उघडें ॥ धृ ॥
हांगकांगहुनि ठिणगि अुडोनी गाठी अवचित मुंबईला ।
अपूर्व अवचित अघोर रूपें प्लेग हुताशन संचरला ॥ १
हाय! बाप! हा! अरेरे! करी गाई! अगाई! नरमहिला ।
भयाण शब्दश्रवणें शेषहि टाकू पाही धृत महिला ॥ २
युवतीस्फुंदन वृद्धक्रंदन तो प्राणांतिक कण्ह यांहीं ।
भुतें भयंकर किंकाळति त्या भयासही जें भयदायी ॥ ३
काळापरिसहि काळहृदय तो विषापरिसही विषारि तो ।
पवनापरिसहि जवन असोनी गिरिपरि अचलत्वा धरितो ॥ ४
भारतभूचे कुंकुम केलिस स्वतंत्रता जिथ पावतसे ।
धन्य अशा श्रीपुण्यपत्तना पहावया हा धावतसे ॥ ५
अस्मानाची खोड मोडण्या सुलतानाचे मनि भरलें ।
प्रजाहिताहित मुळि न पाहता कडक कायदे बहु ठरले ॥ ६
प्लेगनिवारक नियम परी ते संवर्धकचि न त्या असती ।
लोकमतिस त्या ब्रिटिश न मानी सती-वच जसें ती असती ॥७
प्रदीप्त असा प्लेग-पावकी काय कायदा आज्य पडे ।
रॅड-वायु हा हाहाकारचि करीत सुटला चहूकडे ॥ ८