चाफेकर नि रानडे यांजवरील फटका - ४
चाफेकर नि रानडे यांजवरील फटका - ४
(जाति : स्वरगंगा)
विनयशालिनी विनयधारिणी आंग्लां म्हणति कि यशवंती ।
राणी त्यांची विजया विजयी भाग्यशालिनी अवंती ॥१
चिरायुरारोग्याला भोगी तिचा महोत्सव ते करिती ।
योग्यचि समया छळक वधाया मुहूर्त सारे हे धरिती ॥ २
स्वजन-छलन हरणाला झाले सज्ञ अर्पण्या देहाला ।
मोहाला ठोकुनी प्रणामा, निघती त्यागुनि गेहाला ॥ ३
वीरश्रीने शोभित झाली सत्यपालने हर्षवती ।
तारुण्याने सतेज, दैवी स्फूर्ति संचरे हृदेनवती ॥ ४
लालभडक ते नेत्र, बंधुवर बाळकृष्ण दे धीर मना ।
श्री दामोदर सिद्ध जाहला जायालागी खलदमना ॥ ५
कान्ता वदली, 'कान्ता, जाचा देशहिताला करावया ।
पतिराया, घ्या निरोप जावें त्वरित कीर्तिला वरावया' ॥ ६
पवन जवन परि मागे सारित 'गणेशखिंडी' प्रति आला ।
कालासम मग समय साधितो घालायाला तो घाला ॥ ७
भक्ष्य रँड बहु मस्त देखता सिंह धावला बगीकडे ।
गोळी सुटली, गडबड मिटली, दुष्ट नराधम चीत पडे ॥८
----
विजया- व्हिक्टोरिया
Hits: 282
