राऊळ
Parent Category: मराठी पुस्तके
Category: काव्यदीप पुस्तक - ४.भक्ती
राऊळाच्या दारी येण्या
नाही कोणी संग
राऊळाच्या दारी येता
भेटला अभंग ---- १
तुझ्या पायी येता सारे
विरती भावबंध
तुझ्या पायी नाही कोणी
राव आणि रंक ---- २
मनाचा ना लागे कोणा
इतुकाही थांग
कसे करू देवा आता
तूच मला सांग ---- ३
संसाराचा पाहिला मी
राग आणि रंग
नामाचा रे तुझ्या परि
आगळाच ढंग ---- ४
जो तो आहे आपुल्याच
संसारात दंग
मीही आता जाहले रे
पुरती नि:संग ---- ५
मन माझे जाहले रे
आज बा पाखरू
राऊळाची वाट तुझ्या
कशी रे विसरू ---- ६
हात दे रे देवा आता
अंत नको पाहू
राऊळात तुझ्या कैसी
पुन्हा सांग येऊ? ---- ७
Hits: 423
