ओढ
Parent Category: मराठी पुस्तके
Category: काव्यदीप पुस्तक - २.आप्त
बाळपणीचा देवचि आई
स्वर्गसुखाची ठेवचि आई
साडीचा परि शेव तिच्याही
हाती असता चिंता नाही ---- १
शाळेमध्ये मित्र भेटता
खेळाची ती ओढ लागता
वेळेचे मग भानचि नुरता
आनंदाचा गवसे साठा ---- २
तरूणपणाच्या मधुर जीवनी
अनंत शिल्पे मनी कोरली
संगत त्यांची क्षणिक ठरली
मनिची आशा मनी निमाली ---- ३
शिल्पांची त्या संगत नुरता
घेरुनि येई उदासीनता
आठव घरचा येई आता
मनास लाभे खरी शांतता ---- ४
संसाराची ओढ लागता
उठता बसता हसत खेळता
संसारी मग मन हे रमता
विरती सगळया भ्रामक चिंता ---- ५
अखेरच्या त्या टप्प्यावरती
ओढ एकचि मना असे ती
ध्यानी मनी अन् स्वप्नी दिसे ती
परमेशाची सदैव मूर्ती ---- ६
Hits: 462
