सुमनांजली
Parent Category: मराठी पुस्तके
Category: काव्यदीप पुस्तक - २.आप्त
सासुश्वशुर कधि न झाले
असती आपणासारखे
वडिलधा-या आम्ही शब्दा
जाहलो हे पारखे ---- १
मातपित्यासम ही दिधली
प्रीती आम्हा सकलास
लेकी म्हणूनी वागविले
कधी न हो सासुरवास ---- २
लेकरांच्या सुखासाठी
यातनाही भोगल्या
मुखावाटे परि न उमटे
शब्द कधिही आपुल्या ---- ३
चार पुत्रांपरिस असती
चार लेकी आपुल्या
फुले येती नेटकीशी
वेलीवरती सानुल्या ---- ४
छत्र आपले दिवस काही
आणखी जरि लाभते
नवीन नातू पणतू पणती
पाहण्या हे साधते ---- ५
रोपट्याच्या शाखा इवल्या
गेल्या आता दुरवरी
पाहण्या त्या उभयतांनी
यावे आपण झडकरी ---- ६
उठत बसता काम करता
स्मरण आपुले नित्य होते
अश्रु भरती नयनी माझ्या
मनही ऐसे भरुनी येते ---- ७
सुख मिळे जे आज आम्हा
खरी कृपा ही आपुली
स्मरण त्याचे ठेवुनीया
वाहते ही सुमनांजली ---- ८
Hits: 252
